Fokið í flest skjól.

Smalahundi heimilisins var gjörsamlega misboðið í gær.  Fyrir sunnan húsið er gamall sófi sem Tása, smalahundurinn, notar til að hvíla sig eftir að hafa rekið óvelkomnar kindur úr spartúni bóndans.  Þegar hún ætlaði að leggja sig eftir síðasta eftirlitstúr dagsins, var grísinn Andrés búinn að uppgötva þvílík dýrð það er að leggja sig í umræddum sófa.  Þyngdarmismunurinn gerði það að verkum að Tása átti enga möguleika á að helga sér svæðið sitt aftur en gerði þó ítrekaðar tilraunir til að sýna með nærveru sinni, að þetta væri nú eiginlega hennar staður en ekki hans!  Andrés lét sem hann sæi hana ekki, á milli þess sem hann stundi og rumdi af vellíðan yfir því að hafa náð sófanum.  Það er því sýnt að nú verður að finna sófa til að setja í húsið hans, því það er allt eins víst að hálmurinn sé ekki eins lokkandi eftir að hafa prófað þessa sælu!

Athugasemdir

[Heiða (IP-tala skráð) 14.7.2010 kl. 15:56]

Það er nokkuð ljóst hver verður glöð þegar Andrés breytist í jólasteik