Tilhlýðilegt að setja hér nokkur orð.....

Þegar einungis þrír dagar eru eftir af árinu, er loks ritstíflan brostin. 

Ýmislegt hefur drifið á daga síðan í október.  Vinna og aftur vinna, slátrun, sauðfjár, hrossa og svíns, reyking og frágangur í matargeymslum ýmiskonar.  Að öllu þessu loknu skelltum við okkur í vikuferð til Florída, til að kynna USA fyrir bóndandum.  Þar sem hann hafði jú eytt sumrinu í veikindaleyfi var gráupplagt að stinga af í nokkra daga og láta aðra um börn og bú.  Börnin voru "keyrð út" á nokkra staði og ungt par sett sem ráðsmenn á býlið.  Kindurnar komnar á hús með svampa í afturendanum og ráðsmaðurinn setti bara upp svip þegar honum var tjáð að á hverjum degi þyrfti að skoða hvort svampurinn væri ekki á sínum stað!  Þar sem bóndinn er áhugamaður um ameríska bíla, var gaman að sjá hans litla hjarta taka kipp, þegar einn gamall Bronco sást renna hjá, en landareignina prýða nokkur slík eintök og nokkur meira að segja gangfær!  Jafnvel ljóshærðar ungar lögulegar meyjar vöktu ekki áhuga, ja nema ef þær óku á Ford Mustang... þá mátti svo sem gjóa augunum á eftir bílnum. 

Fríið var vel þegið, og komum við heim úthvíld og sælleg.  Jólaundirbúningurinn gekk fljótt og vel fyrir sig og heimagert svín og hangikjöt bragðaðist mjög vel.  Pakkastríðið tók fljótt af og hafa börnin varla sést síðan, því gjafirnar féllu greinilega í góðan jarðveg.     

Athugasemdir

[Ragnheiður , 7.1.2011 kl. 22:19]

Þú mátt ekkert hafa ritstíflu, mér finnst gaman að lesa um sveitastörfin !

Áfram hott hott...það er búin vika af árinu !!

Gleðilegt ár og takk fyrir netsamskiptin á gamla árinu